आडगाव शिवारात दोन वेगवेगळ्या अपघातांत दोन ठार

नाशिक : मुंबई-आग्रा महामार्गावरील आडगाव शिवारात झालेल्या दोन वेगवेगळ्या अपघातांत दोन तरुणांचा मृत्यू झाल्याची घटना घडली आहे़ या प्रकरणी आडगाव पोलीस ठाण्यात अपघाताचे गुन्हे दाखल करण्यात आले आहेत़

ठळक मुद्देआडगाव पोलीस ठाण्यात अपघाताचे गुन्हे दाखल

नाशिक : मुंबई-आग्रा महामार्गावरील आडगाव शिवारात झालेल्या दोन वेगवेगळ्या अपघातांत दोन तरुणांचा मृत्यू झाल्याची घटना घडली आहे़ या प्रकरणी आडगाव पोलीस ठाण्यात अपघाताचे गुन्हे दाखल करण्यात आले आहेत़

भरधाव दुचाकीस्वाराने पुढे जाणाऱ्या वाहनास पाठीमागून दिलेल्या धडकेत मालेगावमधील पंचवीस वर्षीय तरुण ठार झाल्याची घटना आडगाव शिवारात मंगळवारी (दि. १९) दुपारच्या सुमारास घडली़ चेतन मधुकर पवार (२५, रा. पांढरुण, लखमापूरशेजारी, ता. मालेगाव, जि. नाशिक) असे या अपघातात मृत्यू झालेल्या तरुणाचे नाव आहे़ आडगाव पोलिसांनी दिलेल्या माहितीनुसार मंगळवारी दुपारी पावणेदोन वाजेच्या सुमारास चेतन पवार हा दुचाकीने (एमएच ४१, एआर ३००४) नाशिकहून ओझरकडे जात होता़ यावेळी त्याचा वाहनावरील ताबा सुटला व तो पुढील वाहनाला पाठीमागून जाऊन धडकला़ यामध्ये गंभीर दुखापत झाल्याने पवार याचा मृत्यू झाला़ या प्रकरणी पोलीस हवालदार दत्तू खुळे यांच्या फिर्यादीनुसार आडगाव पोलिसांनी अपघाताचा गुन्हा दाखल केला आहे.

दुसरी घटना मुंबई-आग्रा महामार्गावरील आडगाव शिवारात सोमवारी (दि़१८) घडली़ रामदास तुकाराम कर्डिले (रा. तरडोबाची वाडी, जांभळी मळा, ता. शिरुर, जि. पुणे) या तरुणाचा अज्ञात वाहनाने दिलेल्या धडकेत मृत्यू झाला़ आडगाव शिवारात असलेल्या न्यू जमशेदपूर बॉम्बे रोड वेजसमोरून जात असलेल्या रामदास कर्डिले यास अज्ञात भरधाव वाहनाने धडक दिली़ त्यामध्ये जबर मार लागल्याने त्याचा जागीच मृत्यू झाला़ या प्रकरणी लक्ष्मण कर्डिले यांनी दिलेल्या फिर्यादीनुसार आडगाव पोलीस ठाण्यात अज्ञात वाहनचालकाविरोधात गुन्हा दाखल करण्यात आला आहे़