आठशे किलोच्या काचा अंगावर पडून नाशकात तरुणाचा मृत्यू

हुजैफाभाई पत्रावाला यांच्या मालकीचे ग्लास मेकर्सच्या दुकानात काम करणारा साबीरअली हा युवक नेहमीप्रमाणे काम करत असताना अचानकपणे जाड काचांचे तीस ते चाळीस शिट खाली कोसळले. यामुळे तो कामगार दाबला गेला.

ठळक मुद्देकाचेचा जबर मार छाती व पोटाला लागल्यामुळे त्याचा मृत्यू झाल्याचे डॉक्टरांनी सांगितले. खासगी रुग्णालयात त्याच्यावर अतिदक्षता विभागात उपचार सुरू होते

नाशिक : रुग्णालये व कार्यालयांमध्ये फर्निचरच्या कामांतर्गत वापरल्या जाणाऱ्या जाड काचांचे सुमारे ४० शिट गुरुवारी (दि.१९) सारडा सर्कल परिसरातील एका दुकानामध्ये कामगाराच्या अंगावर कोसळले. या शीटच्या सुमारे आठशे किलो वजनाखाली दबलेल्या तरुण कामगाराला तासाभराच्या ‘रेस्क्यू आॅपरेशन’नंतर अग्निशामक दलाच्या जवानांनी सुखरूपपणे बाहेर काढले; मात्र उपचारादरम्यान पावणेआठ वाजेच्या सुमारास त्याला डॉक्टरांनी मयत घोषित केले.
याबाबत सूत्रांकडून मिळालेली सविस्तर माहिती अशी, जुने नाशिकमधील सारडासर्कल परिसरात विविध फॅब्रिकेशन व ग्लास मेकर्सची दुकाने आहेत. या भागात असलेल्या हुजैफाभाई पत्रावाला यांच्या मालकीचे ग्लास मेकर्सच्या दुकानात काम करणारा साबीरअली हा युवक नेहमीप्रमाणे काम करत असताना अचानकपणे जाड काचांचे तीस ते चाळीस शिट खाली कोसळले. यामुळे तो कामगार दाबला गेला. परिसरातील व्यावसायिक व कामगारांना सदर प्रकार लक्षात आल्यानंतर एकच धावपळ उडाली. मोठ्या संख्येने अखंड काचांच्या शिटखाली अडकलेल्या युवकाला बाहेर काढणे शक्य नसल्याने प्रत्यक्षदर्शींकडून तत्काळ अग्निशामक दलाला घटनेची माहिती देण्यात आली. सारडासर्कलपासून अवघ्या काही मीटर अंतरावर असलेल्या अग्निशामक दलाच्या मुख्यालयातून पाच मिनिटांत अत्याधुुनिक हॅजेमेट बंबासह जवान घटनास्थळी पोहचले. जवानांनी तत्काळ दुकानामध्ये प्रवेश करून गर्दी बाजूला करत रेस्क्यू आॅपरेशनला दुपारी साडेतीन ३.३० वाजेच्या सुमारास सुरुवात केली. पत्र्याचे दुकान आणि जमलेली गर्दी व फुटलेल्या काचांमुळे बचावकार्यात अडथळा निर्माण झाला होता. लिफ्टिंग बॅगा कोसळलेल्या काचांच्या ढिगाखाली ठेवून जवानांनी त्यामध्ये गॅस भरण्यास सुरुवात केली. यामुळे कामगाराच्या अंगावर असलेला काचांचा भार वरच्या दिशेने उचलला गेला. जवानांनी मोठ्या कौशल्याने इलेक्ट्रॉनिक कटरचा वापर करून काचेचे शिट कापून काढले. या दुर्घटनेत गंभीरपणे जखमी झालेल्या कामगाराला सुखरूपपणे जीवंत बाहेर काढण्यास दुपारी ४.३० वाजता यश आले. शासनाच्या १०८ या आपत्कालीन वैद्यकीय सुविधा देणाºया रुग्णवाहिकेतून त्या जखमी कामगाराला उपचारार्थ रुग्णालयात त्वरित हलविण्यात आले. मुंबईनाका येथील खासगी रुग्णालयात त्याच्यावर अतिदक्षता विभागात उपचार सुरू होते. काचेचा जबर मार छाती व पोटाला लागल्यामुळे त्याचा मृत्यू झाल्याचे डॉक्टरांनी सांगितले. साबीरअली हा मुळ उत्तरप्रेदश येथील रहिवासी असून तो मागील काही महिन्यांपासून जुन्या नाशकात वास्तव्यास होता. हुजैफा पत्रावाला यांच्या काचेच्या गुदामामध्ये तो मोलमजुरी करुन उदरनिर्वाह चालवित होता. त्याच्या मृत्यूने परिसरात हळहळ व्यक्त होत आहे.