उद्धव ठाकरेंसमोरच शिवसेना आमदाराने गायलं देवेंद्र सरकारचं गुणगान!

आमदार अनिल कदम यांनी आयोजित केलेल्या या सोहळ्यात शिवसेना पक्ष प्रमुख उद्धव ठाकरे यांच्या हस्ते या विकासकामांचे लोकार्पण करण्यात आले, प्रमुख पाहुणे म्हणून महसुलमंत्री चंद्रकांत पाटील व पालकमंत्री गिरीष महाजन यांना पाचारण करण्यात आले होते.

ठळक मुद्देअनिल कदम : युतीची चर्चा की, पक्षांतराची वाट ?

नाशिक : पिंपळगाव बसवंत येथे आमदारांच्या विकास निधीतून करण्यात आलेल्या विविध विकास कामांच्या लोकार्पणाच्या कार्यक्रमासाठी आलेले शिवसेना पक्ष प्रमुख उद्धव ठाकरे यांच्या समक्ष सेना आमदार अनिल कदम यांनी भाजपाच्या मंत्र्यांचे गुणगान गायल्यामुळे राज्यात सेना-भाजपा एकत्र येण्याची चर्चा होत असताना काहींनी यात अनिल कदम हे येत्या निवडणुकीत भाजपाचे कमळ हाती धरणार असल्याची चर्चा सुरू केली आहे.

आमदार अनिल कदम यांनी आयोजित केलेल्या या सोहळ्यात शिवसेना पक्ष प्रमुख उद्धव ठाकरे यांच्या हस्ते या विकासकामांचे लोकार्पण करण्यात आले, प्रमुख पाहुणे म्हणून महसुलमंत्री चंद्रकांत पाटील व पालकमंत्री गिरीष महाजन यांना पाचारण करण्यात आले होते. प्रास्ताविक करताना अनिल कदम यांनी जायकवाडीच्या पाणी प्रश्नाचा उल्लेख करून पालकमंत्री गिरीष महाजन यांनी मराठवाडा आणि नाशिक या दोन जिल्ह्यात योग्य तो समतोल साधत मार्ग काढल्याबददल कौतुक केले तर महसुल मंत्री चंद्रकांत पाटील यांनी शेतकऱ्यांच्या साऱ्या अपेक्षा पुर्ण केल्याचे सांगून एक प्रकारे राज्यातील शेतकऱ्यांचे सर्व प्रश्न पाटील यांनी मिटविल्याचे प्रशस्तीपत्र देऊन टाकले. कदम यांनी महाजन व पाटील यांच्यावर स्तुतीसुमने वाहिल्यामुळे ते भाजपाच्या जवळ गेल्याचा अर्थ राजकीय वर्तुळात काढला जात असून, हे करीत असताना कदम यांना पक्ष प्रमुख उद्धव ठाकरे हे बसलेले असल्याचेही भान राहिलेले नाही.

उद्धव-चंद्रकांत पाटील एकाच गाडीतून...

शिवसेनेच्या मुखपत्रात दररोज राज्य सरकारचे वाभाडे काढले जात असताना कदम यांनी भाजपाच्या मंत्र्यांविषयी काढलेल्या गौरवोद्गारामुळे उपस्थित शिवसैनिकांनाही आश्चर्य वाटले. विशेष म्हणजे ओझर विमानतळावरून उद्धव ठाकरे व चंद्रकांत पाटील या दोघांचेही एकाच वाहनातून सभास्थळी आगमन झाले व या दोघांचेही केंद्रीय संरक्षण राज्यमंत्री डॉ. सुभाष भामरे, पालकमंत्री गिरीष महाजन यांनी स्वागत केल्यामुळे तर सभेत उद्धव ठाकरे काय बोलतात त्यापेक्षाही भाजप-सेनेच्या युतीचीच चर्चा अधिक झडली.