'देशात थापा मारून झाल्या,आता परग्रहावर थापा मारायला जातील'- उद्धव ठाकरे

मोदींच्या घराभोवती उडती तबकडी फिरत असल्याच्या बातमीची खिल्ली त्यांनी उडविली.

मुंबई- 'पंतप्रधान नरेंद्र मोदींनी थापा मारूनच सत्ता आणली आहे. देशात थापा मारून झाल्या, आता परग्रहावर थापा मारायला जातील. मोदींच्या घरावर तबकडी फिरते म्हणजे आता त्यांचे परग्रहावर दौरे सुरू होतील, अशा शब्दात शिवसेना पक्षप्रमुख उद्धव ठाकरे यांनी पंतप्रधान नरेंद्र मोदींवर निशाणा साधला आहे. मोदींच्या घराभोवती उडती तबकडी फिरत असल्याच्या बातमीची खिल्ली त्यांनी उडविली. शिवसेनेच्या ५२व्या वर्धापन दिनानिमित्त आयोजित कार्यक्रमात उद्धव ठाकरे बोलते होते. यावेळी उद्धव ठाकरे यांनी मोदींच्या परदेश दौऱ्यावर व विकासाच्या मुद्द्यावर सडकून टीका केली. 

काही दिवसांपूर्वी नरेंद्र मोदींनी विराट कोहलीचं फिटनेस चॅलेन्ज मान्य करत त्यांचा व्यायाम करतानाचा एक व्हिडीओ पोस्ट केला होता. या व्हिडीओवरही उद्धव ठाकरेंनी आपल्या भाषणातून निशाणा साधला. 'सध्या जो फिटनेस फंडा सुरू आहे तो मीही करून पाहिला पण माझी पाठ धरली. मात्र, मी यांची पाठ काही सोडणार नाही', अशी टिपण्णी उद्धव ठाकरे यांनी केली. 

बुलेट ट्रेन व नाणार प्रकल्पाला असलेल्या विरोधाचा पुनरूच्चार उद्धव ठाकरेंनी केला. राज्याच्या विकासासाठी माझ्या निसर्गसौंदर्य लाभलेल्या कोकणाचं नुकसान मी होऊ देणार नाही, असंही उद्धव ठाकरे यांनी म्हटलं.