ऑनलाइन लोकमत

नागपूर, दि. 15 - नागपूरसह देशभरात खळबळ उडवून देणा-या भारसिंगी नरखेड येथील कथित गोमांस प्रकरणाचे गूढ अद्याप उलगडलेले नाही. शनिवारी पोलिसांना प्रयोगशाळा तज्ज्ञांकडून अहवाल मिळाला. त्यात हे मांस गोवंशाचे असल्याचे म्हटले आहे. मात्र, ते गाईचेच आहे, असा स्पष्ट उल्लेख नसल्यामुळे कथित गोरक्षकांनी केलेल्या दाव्यांवर पाणी फेरले गेले आहे. 
 
सलीम इस्माईल शहा (३२) हा बुधवारी सकाळी १०.३० वाजताच्या सुमारास एमएच-४०/५६३६ क्रमांकाच्या अ‍ॅक्टिव्हाने जलालखेड्याहून काटोलला जात असताना भारसिंगी येथे काही तरुणांनी त्याला अडविले. सलीमकडे गोमांस असल्याचा त्यांना संशय होता. त्यामुळे तरुणांनी त्याच्या वाहनाची डिक्की तपासली. त्यात पिशव्यांमध्ये मांस  आढळून येताच तरुणांनी जलालखेडा पोलिसांना सूचना दिली. त्यामुळे सलीमने घटनास्थळाहून पळ काढला.  तरुणांनी पाठलाग करून त्याला  पकडले आणि जबर मारहाण केली. त्यात सलीम  बेशुद्ध झाला होता. पोलिसांनी  घटनास्थळ गाठून सलीमला तसेच त्याचे वाहन व संपूर्ण साहित्य ताब्यात घेतले आणि जलालखेड्याला आणले. स्थानिक प्राथमिक आरोग्य केंद्रात प्रथमोपचार केल्यानंतर त्याला बुधवारी सायंकाळी नागपुरातील मेयो रुग्णालयात भरती केले. 
 
हे प्रकरण चिघळल्यामुळे सलीमला मारहाण केल्याप्रकरणी बुधवारी रात्री पोलिसांनी मोरेश्वर तांदूळकर (३०, रा. भारसिंगी, ता. नरखेड), जगदीश चौधरी (२८, रा. मदना, ता. नरखेड), अश्विन उईके (२६, रा. नारसिंगी, ता. नरखेड) आणि रामेश्वर तायवाडे ( २७, रा. जामगाव, ता. नरखेड) या चौघांना अटक केली. आरोपींची सोमवारपर्यंत (दि. १७)  कोठडीही पोलिसांनी मिळविली आहे. या घटनेने भारसिंगी जलालखेडाच नव्हे तर देशभरात खळबळ उडवली होती. नरखेड तालुक्यात प्रचंड तणाव निर्माण झाला होता. घटनेचे गांभीर्य लक्षात घेत जिल्हा पोलीस प्रशासनाने भारसिंगी तसेच सलीम राहत असलेल्या काटोल येथे प्रचंड पोलीस बंदोबस्त तैनात केला होता.   दुसरीकडे जप्त केलेले मांस विश्लेषणासाठी प्रयोगशाळेत पाठविले होते. या संबंधाने उलटसुलट चर्चेला उधाण आले असताना पोलिसांना शनिवारी या संबंधाने तज्ज्ञांचा अहवाल मिळाला. त्यात हे मांस गोवंशाचे असल्याचे नमूद आहे. परंतु गाय की बैलाचे ते स्पष्ट नसल्यामुळे या प्रकरणाचा उलगडा झाला नाही. 
 
दरम्यान, सलीमला गुरुवारी सकाळी मेयो रुग्णालयातून सुटी देण्यात आली. त्यानंतर त्याच दिवशी सायंकाळी त्याच्या छातीत वेदना व्हायला सुरुवात झाल्याने त्याला पुन्हा मेयोमध्ये भरती करण्यात आले होते. 
 
पोलीस म्हणतात, शिक्षा सारखीच 
हे मांस बैलाचे असल्याचे तसेच ते आमनेर (ता. वरुड, जिल्हा अमरावती) येथून खरेदी केल्याचे सलीमने पोलिसांना दिलेल्या बयानात सांगितले होते. त्यामुळे पोलिसांनी सलीमविरुद्ध  महाराष्ट्र प्राणी संरक्षण अधिनियम १९९५ / गोवंश हत्याबंदी कायदा, मार्च २०१५ कलम ५ (क) अन्वये गुन्हाही नोंदविला होता. विशेष म्हणजे, मांस गायीचे असो की बैलाचे, ते बाळगणा- यांना कायद्यात सारख्याच शिक्षेची (१ वर्षे कारावास आणि २ हजार रुपये दंड) तरतूद आहे. सलीमजवळ मांस आढळल्याने आणि त्याने तशी कबुलीही दिल्याने त्याला ही शिक्षा होऊ शकते, असे संबंधित सूत्रांचे सांगणे आहे. 
 
सलीम भाजपामधून निष्कासित
- गोरक्षकांनी सलीमला मारहाण केल्याच्या घटनेनंतर लगेच भाजपाचे जिल्हाध्यक्ष डॉ. राजीव पोतदार यांनी प्रसिद्धी पत्रक जारी करीत सलीम हा भाजपाचा कार्यकर्ता व माजी पदाधिकारी असल्याचे म्हटले होते. या घटनेचा निषेध करत दोषींवर कठोर कारवाईची मागणी केली होती. मात्र, शनिवारी प्रयोगशाळा तज्ज्ञांच्या अहवालात संबंधित मांस गोवंशाशी संबंधित असल्याचे स्पष्ट होताच भाजपानेही आपली भूमिका बदलली व सलीमला पक्षातून निष्कासित केले. सलीमवर कायद्यानुसार कारवाई व्हावी, अशी माागणीही जिल्हाध्यक्ष डॉ. राजीव पोतदार यांनी केली आहे.