पिंपरी : आजारी आईला भेटण्यास आलेल्यावर पूर्ववैमनस्यातून सात जणांच्या टोळक्याचा कोयता व चॉपरने वार

सोमवारी रात्री साडेआकराच्या सुमारास खराळवाडी येथील भागवत गीता मंदिराजवळ ही घटना घडली.

 पिंपरी : पुर्वीच्या भांडणाचा राग मनात धरुन सात जणांच्या टोळक्यांनी कोयता व चॉपरने एकावर वार करण्यात आले. ही घटना सोमवारी रात्री साडेआकराच्या सुमारास खराळवाडी येथील भागवत गीता मंदिराजवळ घडली. गणेश विलास शिंगाडे (रा, खराळवाडी) असे जखमीचे नाव आहे. जखमी तरूणावर तडिपारीची कारवाई झाली आहे, तो आजारी आईला भेटण्यास खराळवाडीत आला असता, त्याच्यावर हल्ला झाला.

पोलिसांनी या प्रकरणातील आरोपी विठ्ठल मारुती बनपट्टे (वय ३५), कमलेश युवराज बनपट्टे (वय २४), गणेश राजू बनपट्टे (वय २६), जॉर्ज विल्यम फ्रान्सीस (वय ३५) तसेच अविनाश राजू चौगुलै (वय २२ रा वडारवाडी, गोखलेनगर) या पाच जणांना अटक केली आहे. संजय बनपट्टे (वय ३५), राजु बनपट्टे (वय ४५) हे दोघे फरार आहेत. गणेश शिंगाडे (वय २८रा. खराळवाडी) यांनी पिंपरी पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, दिनेश शिंगाडे याला पिंपरी हद्दीतून तडीपार करण्यात आले आहे. तो आपल्या आजारी आईला पाहण्यासाठी खराळवाडी येथील घरी आला होता.आईला भेटून दिनेश परत जात होता. त्यावेळी विठ्ठल बनपट्टे याने जुन्या भांडणाचा राग मनात धरून दिनेश याच्यावर साथीदारांच्या मदतीने कोयता व चॉपरने वार केले. यामध्ये दिनेश याच्या पोटावर व डोक्याच्या मागील बाजूस जखमा झाल्या. यावेळी भांडणे सोडविण्यासाठी गेलेल्या दिनेश यांची नातेवाईक महिला सुंदर शिंगाडे यांच्यासुद्धा हाताला मार लागला. या प्रकरणी पिंपरी पोलीस ठाण्याचे पोलीस उपनिरीक्षक सागर पाटील करीत आहेत.