ATS takes doctor from Khulatabad; Terrorist Connection | औरंगाबादच्या खुलताबादमध्ये एटीएसकडून डॉक्टर ताब्यात; दहशतवादी कनेक्शन
औरंगाबादच्या खुलताबादमध्ये एटीएसकडून डॉक्टर ताब्यात; दहशतवादी कनेक्शन

औरंगाबाद : गेल्या महिन्यात ताब्यात घेण्यात आलेल्या मुंब्रा आणि औरंगाबाद येथील दहशतवाद्यांशी संपर्कात असल्याच्या संशयातून खुलताबात येथील एका डॉक्टरला एटीएसने ताब्यात घेतले आहे. 


गेल्या आठवड्यामध्ये जवानांना अन्नातून विषबाधा करून संपवण्याचा कट रचल्याचे समोर आले होते. या पार्श्वभुमीवर ही कारवाई केल्याचे समोर येत आहे. खुलताबाद येथील एका डॉक्टरची 24 ते 26 फेब्रुवारीदरम्यान दहशतवाद विरोधी पथकाने चौकशी केली होती. हा डॉक्टर इसिस या दहशतवादी संघटनेच्या विचारांनी प्रभावित असल्याचाही संशय होता.

 
तसेच एटीएसने अटक केलेल्या संशयितामार्फत जम्मू-काश्मीरमधील दहशतवाद्यांना पैसा पुरविल्याचा दावाही एटीएसने विशेष न्यायालयासमोर केला होता. यामुळे या डॉक्टरचेही दहशतवाद्यांशी कनेक्शन असल्याचा संशय एटीएसला होता. 


एटीएसने सलमान खान, फहाद शाह, झमेन  कुटेपडी, मोहसीन खान, मोहम्मद मझर शेख, ताकी खान, सरफराज अहमद, झाहीद शेख आणि १७ वर्षीय अल्पवयीन मुलगा या संशयित आरोपींना अटक केले असून त्यांच्याकडून काही रसायने, इलेक्ट्रॉनिक्स गॅझेट्स, धारदार चाकू, मोबाईल्स आणि सिम कार्ड्स पोलिसांनी हस्तगत केले आहे. आयसिस या आंतराष्ट्रीय दहशतवादी संघटनेच्या विचारसरणीने प्रेरित होऊन दहशतवादी टोळी बनविण्याचे व दहशतवादी हल्ले घडवून आणण्याचे कट रचून त्या दृष्टीने साहित्याची जमवाजमव केल्याचे निष्पन्न होत असल्याने ताब्यात घेतलेल्या संशयितांविरोधात बेकायदेशीर हालचाली प्रतिबंधक कायदा १९६७ कलम १८, २०, ३८, ३९,भा . दं. वि. कलम १२० (ब), महाराष्ट्र पोलीस कायदा कलम १३५ अन्वये गुन्हा दाखल करण्यात आला आहे. 


२६ जानेवारीच्या पार्श्वभूमीवर काही अतिरेकी कृत्य करण्याच्या तयारीत असल्याचे निष्पन्न होताच एटीएसच्या सुमारे १२ पथकांनी औरंगाबाद आणि ठाण्यातील मुंब्रा येथील आठ ठिकाणाहून ९ जणांना ताब्यात घेतले. या ९ जणांपैकी १ जण अल्पवयीन म्हणजेच १७ वर्षाच्या आहे. 

त्यांचेही कनेक्शन
दोन वर्षांपूर्वी मुंबई एटीएसने मुंब्रा भागातून मुदब्बीर शेख या इसिसच्या भारताच्या कमांडरला अटक केली होती. नंतर तेथूनच निझाम शेख उर्फ उमर याला बेड्या ठोकल्या. त्याचा आणि ९ जणांचा संबंध आहे का, या दिशेनेही एटीएस तपास करत आहे.

औरंगाबादमध्ये यांना घेतले ताब्यात
औरंगाबाद येथून मोहंमद मोहसीन सिराजउल्लाह खान, त्याचा मेहुणा काजी सरफराज, मोहंमद तकीउल्लाह सिराज खान यांना ताब्यात घेतले. मोहसीनचा दुसरा मेहुणा मोहंमद मुशाहेदुल इस्लाम यालाही ताब्यात घेतल्याचे समजते.


Web Title: ATS takes doctor from Khulatabad; Terrorist Connection
Get Latest Marathi News & Live Marathi News Headlines from Politics, Sports, Entertainment, Business and local news from all cities of Maharashtra.