अखिल भारतीय मराठी चित्रपट महामंडळाच्या फेरमतमोजणीत सुशांत शेलार विजयी

By लोकमत न्यूज नेटवर्क | Published: August 21, 2018 01:21 PM2018-08-21T13:21:09+5:302018-08-21T13:24:14+5:30

अखिल भारतीय मराठी चित्रपट महामंडळाच्या अडीच वर्षांपूर्वी झालेल्या निवडणुकीतील फेरमतमोजणीत अभिनेता गटात सुशांत शेलार विजयी झाले. त्यांनी माजी अध्यक्ष विजय पाटकर यांचा १६ मतांनी पराभव केला. शेलार यांना ५९१ मते, तर विजय पाटकर यांना ५७३ मते पडली. या निर्णयाकडे सर्व चित्रपट व्यावसायिकांचे लक्ष लागून राहिले होते.

Sushant Shelar won the franchise in the film corporation | अखिल भारतीय मराठी चित्रपट महामंडळाच्या फेरमतमोजणीत सुशांत शेलार विजयी

अखिल भारतीय मराठी चित्रपट महामंडळाच्या कोल्हापूर येथील कार्यालयात झालेल्या फेरमतमोजणीत अभिनेते सुशांत शेलार विजयी झाल्यानंतर अध्यक्ष मेघराज राजेभोसले यांनी त्यांचे अभिनंदन केले. यावेळी धनाजी यमकर, बाळा जाधव, अरुण भोसले, रोहन स्वामी, सतीश बिडकर, आदी उपस्थित होते.

googlenewsNext
ठळक मुद्देचित्रपट महामंडळाच्या फेरमतमोजणीत सुशांत शेलार विजयीअडीच वर्षांनी झाला निर्णय : विजय पाटकर यांचा १६ मतांनी पराभव

कोल्हापूर : अखिल भारतीय मराठी चित्रपट महामंडळाच्या अडीच वर्षांपूर्वी झालेल्या निवडणुकीतील फेरमतमोजणीत अभिनेता गटात सुशांत शेलार विजयी झाले. त्यांनी माजी अध्यक्ष विजय पाटकर यांचा १६ मतांनी पराभव केला. शेलार यांना ५९१ मते, तर विजय पाटकर यांना ५७३ मते पडली. या निर्णयाकडे सर्व चित्रपट व्यावसायिकांचे लक्ष लागून राहिले होते.

अखिल भारतीय मराठी चित्रपट महामंडळाची एप्रिल २०१६ मध्ये निवडणूक झाली होती. त्यामध्ये मेघराज राजेभोसले, सतीश रणदिवे यांच्या समर्थ पॅनेलने १४ पैकी १२ जागांवर विजय मिळविला होता. अभिनेता गटामध्ये विजय पाटकर १८ मतांनी विजयी झाले होते.

यावेळी मतमोजणी प्रक्रियेबद्दल अभिनेते शेलार यांनी हरकत घेत धर्मादाय आयुक्त कार्यालयाकडे फेरमतमोजणीची मागणी केली होती; पण ती मागणी कार्यालयाने फेटाळून लावल्याने त्यावर शेलार यांनी उच्च न्यायालयात धाव घेतली. न्यायालयाच्या आदेशाने सोमवारी चित्रपट महामंडळाच्या कार्यालयात फेरमतमोजणी झाली.

निवडणूक अधिकारी म्हणून धर्मादाय अधीक्षक शिवराज नाईकवडे, निरीक्षक आसिफ शेख आणि एम. के. नाईक यांच्या यांनी सकाळी अकरा ते सायंकाळी पाच या वेळेत फेरमतमोजणी केली.

तब्बल अडीच वर्षांनी झालेल्या या फेरमतमोजणीत शेलार यांना ५९१, तर पाटकर यांना ५७५ मते मिळाली. त्यामुळे शेलार हे १६ मतांनी विजयी झाले, तर पराभव झाल्याने पाटकर यांचे संचालकपद रद्द झाले आहे.

उच्च न्यायालयाकडून फेरमतमोजणी निकालाची प्रत अथवा अहवाल प्राप्त झाल्यावर महामंडळाकडून शेलार यांच्या विजयाची घोषणा करण्यात येणार आहे.

यावेळी महामंडळ अध्यक्ष मेघराज राजेभोसले, उपाध्यक्ष धनाजी यमकर, कार्यवाह रणजित जाधव, अरुण भोसले, सतीश चव्हाण, सुरेंद्र पन्हाळकर, आकाराम पाटील, सतीश बिडकर, रोहन स्वामी, रवींद्र बोरगावकर उपस्थित होते.
 

गेल्या अडीच वर्षांपासून न्यायासाठी मी लढत होतो आज तो मिळाला. उरलेल्या पावणेतीन वर्षांत सभासदांच्या भल्याचे निर्णय कसे घेता येतील, यावर अधिक भर असेल.
- सुशांत शेलार, अभिनेते

फेरमतमोजणीत माझा पराभव झाला असला तरी तो मला मान्य आहे. पुढील काळातही एक सभासद या नात्याने मी चांगली भूमिका पार पाडेन. संचालक मंडळाच्या चांगल्या निर्णयाच्या मागे सदैव राहीन.
- विजय पाटकर, अभिनेते

 

 

 

Web Title: Sushant Shelar won the franchise in the film corporation

Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.