राजू शेट्टींच्या प्रचारार्थ जयकांत शिक्रे, हातकणंगलेत प्रकाश राज गरजले

राजू शेट्टी यांनी काढलेली किसान संघर्ष यात्रा तसेच शेट्टी यांच्या वाटचालीमुळे प्रकाश राज प्रभावित झाले आहेत.

सांगली - अजय देवगणच्या सिंघम चित्रपटात जयकांत शिक्रे या खलनायकाची भूमिका केल्यानंतर देशभरात प्रकाशझोतात आलेले दाक्षिणात्य अभिनेते प्रकाश यांनी चक्क राजू शेट्टींच्या प्रचारसभेला हजेरी लावली. कोल्हापूर जिल्ह्यातील हातकणंगले लोकसभा मतदारसंघात प्रकाश राज यांनी राजू शेट्टींसाठी प्रचार केला. विशेष म्हणजे प्रकाश राज हेही या निवडणुकीत बंगळुरू सेंट्रल मतदारसंघातून निवडणूक लढवत आहेत. 

राजू शेट्टी यांनी काढलेली किसान संघर्ष यात्रा तसेच शेट्टी यांच्या वाटचालीमुळे प्रकाश राज प्रभावित झाले आहेत. त्यामुळे त्यांनी राजू शेट्टी यांच्या प्रचाराला त्यांनी हातगणंगलेत हजेरी लावली. 2014 मध्ये भाजपसोबत असलेले राजू शेट्टी एनडीए सरकारमधून बाहेर पडले. राज्यातही त्यांनी महायुतीमधून बाहेर पडण्याचा निर्णय घेतला. राजू शेट्टी यांना काँग्रेस आणि राष्ट्रवादीने पाठिंबा दिला आहे. हातकणंगले मतदारसंघातून स्वाभिमानी शेतकरी संघटनेच्या तिकीटावर खासदार राजू शेट्टी पुन्हा एकदा निवडणुकीच्या रिंगणात आहेत. त्यांचं कुटुंबीयदेखील प्रचारात सक्रीय दिसत आहेत. राजू शेट्टींच्या शेतकरी संघटनेच्या कामाबद्दल प्रकाश राज यांनी कौतुक केलं आहे. त्यामुळेच, प्रकाश राज हे अपक्ष उमेदवार असतानाही राजू शेट्टींच्या प्रचारासाठी हातकणंगले मतदारसंघात दाखल झाले. यावेळी, त्यांनी जाहीर सभेला संबोधितही केले. 

लोकसभा निवडणुकांच्या तिसऱ्या टप्प्यात कोल्हापूर मतदारसंघात 23 एप्रिल रोजी मतदान होत आहे. त्यामुळेच प्रचारतोफा थंडावण्याच्या 2 दिवस अगोदर राज यांनी राजू शेट्टींच्या प्रचारार्थ सभा घेतली. राजू शेट्टी हे गेल्या 2 निवडणुकांमध्ये येथून विजयी झाले आहेत. त्यामुळे यंदा विजयाची हॅटट्रीक साधण्याची त्यांना संधी आहे. राजू शेट्टी यांना शिवसेनेच्या धैर्यशील माने यांचे आव्हान आहे.