कोंडवाड्याअभावी जनावरे रस्त्यावर

शहरात वाढत असलेल्या वाहतूकीच्या समस्येवर वाहतूक विभाग एक ना एक नवनवीन उपक्रम राबवून आटोक्यात आणण्याचे प्रयत्न करीत असतानाच शहरात मोकाट जनावरांमुळे वाहतुकीची समस्या वाढतच चालली आहे.

ठळक मुद्देवाहतुकीला जनावरांचा त्रास : नगर परिषद प्रशासनाचे दुर्लक्ष

लोकमत न्यूज नेटवर्क
गोंदिया : शहरात वाढत असलेल्या वाहतूकीच्या समस्येवर वाहतूक विभाग एक ना एक नवनवीन उपक्रम राबवून आटोक्यात आणण्याचे प्रयत्न करीत असतानाच शहरात मोकाट जनावरांमुळे वाहतुकीची समस्या वाढतच चालली आहे. मात्र नगर परिषदेकडे या मोकाट जनावरांना बंदीस्त करून ठेवण्यासाठी एकही कोंडवाडा नसल्याने जनावरे शहरात मोकाट फिरत आहेत. जनावरे रस्त्यांवरच ठाण मांडत असल्याने वाहतूकीला त्रास होत असून यातून अपघातही घडत आहेत. मात्र पालिकेचे याकडे पूर्णपणे दुर्लक्ष दिसून येत आहे.
शहरातील वाढती लोकसंख्या व त्याप्रमाणात वाहनांची संख्याही झपाट्याने वाढत चालली आहे. हे होत असताना मात्र रस्ते आहे तसेच आहेत. त्यात वाढ होत नसून उलट अतिक्रमणामुळे रस्ते अधिकच अरूंद होत चालले आहे. परिणामी आजघडीला शहरातून गाडी चालविणे कठीण व धोक्याचे झाले आहे. शहरातील या अव्यवस्थीत वाहतुकीला घेऊन वाहतूक विभागाची डोकेदुखी वाढली आहे. तरिही वाहतुकीची समस्या सोडविण्यासाठी वाहतूक विभाग ट्राफीक सिग्नल, वन साईड पार्कींग सारखे उपक्रम राबवित आहे.
मात्र शहरात मोकाट फिरत असलेल्या जनावरांपुढे वाहतूक विभागही नतमस्तक झाला आहे. बघावे त्या रस्त्यावर मोकाट जनावरांचे कळप दिसून येते. रस्त्याच्या मधोमध जनावरांचा डेरा राहत असल्याने त्यातून वाट काढणे कठीण होत आहे. मात्र यामागेही नगरपरिषदेची अकार्यक्षमता लपून बसली आहे.
त्याचे कारण असे की, नगरपरिषदेकडे मोकाट जनावरांना कोंडून ठेवण्यासाठी आजघडीला एकही कोंडवाडा नाही. कोंडवाडा नसल्याने रस्त्यावर फिरत असलेल्या जनावरांना पकडून डोकेदुखी पाळण्याच्या नादात नगरपरिषद पडत नाही.
नगरपरिषदेचा हलगर्जीपणा व अकार्यक्षमतेचा प्रभाव शहरातील वाहतुकीवर पडत असून शहरवासीयांसह वाहतूक विभागाचीही डोकेदुखी वाढवीत आहे. त्यामुळे पालीका प्रशासन केव्हा यावर योग्य पाऊल उचलते व कोंडवाड्याची व्यवस्था करून वाहतूक विभागाला सहकार्य करते याकडे शहरवासीयांचे लक्ष लागले आहे.
कोडंवाडे तोडले, आवकही खुंटली
नगरपरिषदेकडे पूर्वी २ कोंडवाडे होते. एक नगरपरिषद कार्यालयाच्या मागे तर दुसरा गोविंदपूर शाळेत. मात्र नगरपरिषदेने हे दोन्ही कोंडवाडे तोडून टाकले. यातील नगरपरिषदेच्या मागील बाजूला असलेल्या कोंडवाड्याच्या जागेवर कॉम्प्लेक्स तयार करण्यात आले आहे. तर गोविंदपूर येथील शाळेत असलेल्या कोंडवाडा पाडून जागा मोकळी करण्यात आली. या कोंडवाड्यात पकडून ठेवलेल्या जनावरांच्या मोबदल्यात नगरपरिषदेला आवकही होत होती. मात्र कोंडवाडे तोडण्यात आल्याने नगरपरिषद या उत्पन्नापासून वंचीत आहे.
जुन्या फायर आॅफिसचा कोंडवाड्यासाठी वापर
कोंडवाडे तोडल्यानंतर नगरपरिषद कार्यालयाच्या शेजारी असलेल्या जुन्या फायर आॅफिसचा जनावरे कोंडण्यासाठी वापर केला जात होता. मात्र नगरपरिषदेने आता कित्येक महिन्यांपासून मोहीम राबविलीच नाही. परिणामी ही जागाही भयान पडून आहे. यामुळे मोकाट जनावरे रस्त्यावरच बसून राहतात. त्याचा फटका मात्र शहरवासीयांना सहन करावा लागत आहे.