पतीचा खून करून मिसिंग तक्रार देणाऱ्या पत्नीस प्रियकरासह अटक 

बोईसर पोलिसांनी या दोघांनाही अटक केली आहे.

ठळक मुद्देअनिल कुमार रावत (32) असे हत्या झालेल्या व्यक्तीचे नाव असून ममता रावत आणि सोनू (22) अशी आरोपींची नावे आहेत.अनैतिक संबंधास पतीचा अडथळा येत असल्याने दोघांनीही त्याच्या हत्येचा कट रचला.

पालघर  - बोईसर परिसरात एक धक्कादायक घटना घडली आहे. पत्नी व तिच्या प्रियकराने मिळून पतीची हत्या केली आणि बनाव रचत मिसिंगची तक्रार दाखल केली होती.  अनिल कुमार रावत (32) असे हत्या झालेल्या व्यक्तीचे नाव असून ममता रावत आणि सोनू (22) अशी आरोपींची नावे आहेत. बोईसर पोलिसांनी या दोघांनाही अटक केली आहे.

पोलिसांनी दिलेल्या माहितीनुसार, अनिल कुमार रावत हा पालघर येथील एका कंपनीत सुपरवायझरचे काम करत होता. अनिलची पत्नी ममता हिने 15 फेब्रुवारीला तो दोन दिवसांपासून घरी आला असल्याची तक्रार बोईसर पोलीस ठाण्यात नोंदवली होती. दरम्यान, बोईसर येथील जंगलामध्ये एका अज्ञात इसमाचा मृतदेह पोलिसांना सापडला. मृतदेहाची अवस्था खराब असल्याने तो नक्की कोणाचा याचा शोध घेणे अवघड होते. परंतु काही दिवसांपूर्वी अनिलच्या पत्नीने तो हरवला असल्याची तक्रार दिली असल्याने पोलिसांनी तिला मृतदेहाची ओळख पटवण्यासाठी बोलावले. यावेळी ममताने हा आपला पतीच असल्याचे सांगितले. या प्रकरणी पोलिसांनी अज्ञात आरोपींविरोधात कलम 302 आणि 201 अन्वये गुन्हा दाखल केला.

हत्येप्रकरणी पोलिसांना अनिलची पत्नी ममता हिच्यावर दाट संशय होता. तसेच गेल्या काही महिन्यांपासून अनिलच्या घरी राहण्यासाठी आलेल्या सोनू याच्यावरही पोलिसांना संशय होता. सोनू हा अनिलचा लांबचा नातेवाईक असल्याने तो तीन महिन्यांपासून त्यांच्या घरी राहण्यास आला होता. याच दरम्यान ममता आणि त्याच्यामध्ये जवळीकता आली होती. अनैतिक संबंधास पतीचा अडथळा येत असल्याने दोघांनीही त्याच्या हत्येचा कट रचला.