कागदपत्रांची मागणी केल्याने दुचाकीस्वाराची वाहतूक पोलिसाला मारहाण

इतर पोलिसांनी धाव घेत वाद मिटवला

बीड : कागदपत्रांची विचारणा केल्याने एका दुचाकीस्वाराने वाहतूक पोलीस कर्मचा-याला शिवीगाळ करीत मारहाण केली. ही घटना गुरूवारी दुपारी वाहतूक शाखेच्या पोलीस चौकीसमोर घडली. याप्रकरणी शिवाजीनगर ठाण्यात दुचाकीस्वारावर गुन्हा दाखल झाला आहे.

परशुराम ज्ञानदेव माने (३६ रा.हातोला पारगाव जि.बीड ह.मु. फयाज नगर एमआयडीसी वाळूज ता.जि.औरंगाबाद) असे आरोपीचे नाव असून एस.एम.सावंत मारहाण झालेल्या कर्मचाºयाचे नाव आहे. माने हा कार्यक्रमानिमित्त बीडला आला होता. परत गावी जात असताना त्याची दुचाकी (एमएच २० सीपी ५३६६) पोलीस चौकीसमोर सावंत यांनी अडविले. लायसन्सची विचारणा केल्यावर त्याने औरंगाबादला असल्याचे सांगितले. दंड भरा म्हणल्यावर अरेरावी करीत दंड भरण्यास नकार दिला. दंड पाहिजे असल्यास औरंगाबादला चला, असा उलट प्रश्न केला. त्याची दुचाकी खाली घेण्यास सांगितल्याने त्याला राग अनावर झाला आणि त्याने खाली उतरत सावंत यांचे गचुरे पकडत पोटात मारले. त्यामुळे ते खाली कोसळले.

बाजुच्या इतर पोलीस कर्मचाºयांनी धाव घेत हा वाद मिटविला. 
ही सर्व माहिती पोलीस निरीक्षक राजीव तळेकर यांना दिल्यानंतर ते घटनास्थळी आले. त्यानंतर मानेला शिवाजीनगर ठाण्यात नेण्यात आले. रात्री ७.30 वाजता त्याच्यावर शासकीय कामात अडथळा आणण्यासह इतर कलमान्वये गुन्हा दाखल करण्यात आला आहे.