खेळताना छतावरून पडल्याने २ वर्षीय चिमुलीचा मृत्यू 

दुसऱ्या मजल्यावरील घरासमोर खेळत असताना अचानक तोल जाऊन पडल्याने एक २ वर्षीय चिमुकली रविवारी सायंकाळी गंभीर जखमी झाली. आज पहाटे उपचारा दरम्यान तिचा शासकीय रुग्णालय घाटी येथे मृत्यू झाला.

औरंगाबाद : दुसऱ्या मजल्यावरील घरासमोर खेळत असताना अचानक तोल जाऊन पडल्याने एक २ वर्षीय चिमुकली रविवारी सायंकाळी गंभीर जखमी झाली. आज पहाटे उपचारा दरम्यान तिचा शासकीय रुग्णालय घाटी येथे मृत्यू झाला. उमेरा अकबर शेख असे मृत चिमुकलीचे नाव असून ही घटना सिडको येथील चिश्तिया कॉलनी येथे घडली. 

याबाबत अधिक माहिती अशी की, रविवारी संध्याकाळी इमारतीच्या दुसऱ्या मजल्यावर उमेरा ही खेळत होती व तिची आई घरकाम करीत होती. याच दरम्यान उमेरा खेळता खेळता छताच्या कठड्याजवळ गेली येथेच तिचा तोल गेला आणि ती खाली पडली. यावेळी इमारतीच्या खाली उभ्या रिक्षावर ती पडून जमिनीवर पडली. उमेराच्या किंकाळ्याने तिच्या आईने खाली धाव घेतली. परिसरातील नागरिकांच्या मदतीने उमेराला लागलीच जवळच्या खाजगी रुग्णालयात नेण्यात आले तेथून अधिक उपचारासाठी तिला शासकीय रुग्णालय घाटी येथे दाखल करण्यात आले. येथे उपचार सुरु असताना आज पहाटे तीन वाजेच्या सुमारास तिची प्राणज्योत मालवली. या प्रकरणी सिडको पोलीस ठाण्यात अकस्मात मृत्यूची नोंद करण्यात आली असून पुढील तपास पोलीस नाईक डी. आर. नलावडे करत आहेत.