स्वामी समर्थ महाराजांची पालखी मिरवणूक उत्साहात

अक्कलकोट येथून आलेल्या श्री स्वामी समर्थ महाराज यांच्या पालखीचे बजाजनगरात शनिवारी भाविकांतर्फे स्वागत करण्यात आले.

वाळूज महानगर : अक्कलकोट येथून आलेल्या श्री स्वामी समर्थ महाराज यांच्या पालखीचे बजाजनगरात शनिवारी भाविकांतर्फे स्वागत करण्यात आले. परिसरातील असंख्य भाविकांनी स्वामी समर्थांच्या पादुकांचे दर्शन घेतले. यानंतर पालखीची बजाजनगरातून मिरवणूक काढण्यात आली होती.

श्री स्वामी समर्थ महाराज अन्नछत्र मंडळ अक्कलकोट पालखीचे दरवर्षी बजाजनगरात आगमन होत असते. बजाजनगरातील श्री सिद्धीविनायक मंदिराजवळ शनिवारी या पालखीचे स्वागत करुन दर्शन घेतले. यानंतर शेकडो भाविकांच्या उपस्थितीत पालखीची मिरवणूक काढण्यात आली. याप्रसंगी भाविकांनी टाळ-मृदंगाचा गजर व पावली खेळत मिरवणुकीत सहभाग नोंदविला होता.

बजाजनगरातील स्वेदशिल्प हाऊसिंग सोसायटीत या पालखी मिरवणुकीचा समारोप झाला. यानंतर अनंत महाराज पोतदार यांच्या प्रमुख उपस्थितीत आरती करण्यात आली. बजाजनगरात पालखी मिरवणुकीची सांगता झाल्यानंतर सायंकाळी या पालखीचे औरंगाबाद शहराकडे प्रस्थान झाले.