भरधाव कंटेनरची दुचाकीला धडक; एकजण जागीच ठार

कंटेनर दुचाकीला जोराची धडक दिली व भरधाव वेगाने निघून गेला.

ठळक मुद्देपाच मित्र सोमवारी रात्री जेवणासाठी बाहेर होते घराकडे परतत असताना दुचाकीला कंटेनरने उडवले

वाळूज महानगर (औरंगाबाद ) : वाळूजकडूनऔरंगाबादच्या दिशेने जाणाऱ्या भरधाव कंटेनरने दुचाकीला जोराची धडक दिल्याने झालेल्या अपघातात एक ठार तर एक जण गंभीर जखमी झाला आहे. ही घटना मंगळवारी (दि.१६) पहाटे कामगार चौकालगत घडली. मनोज धोडिंराम वायकर ( ३३, रा. साळेगाव ता. केज. जि. बीड, ह.मु.साईनगर सिडको ) हा मयत झाला असून त्याचा मित्र प्रविण रमेश बांगड (५०, रा. आरएक्स - ७/१२ बजाजनगर) गंभीर जखमी झाला आहे.

या विषयी अधिक माहिती अशी की, प्रविण बांगड (रा. बजाजनगर), मनोज वायकर (रा. साईनगर सिडको), दिनेश दुधाट, विजय राजगुरु व सोनु परमार (रा. सर्व वडगाव कोल्हाटी) हे ५ जण सोमवारी रात्री ११ वाजता पंढरपूरातील एका हॉटेलवर जेवण करण्यासाठी गेले होते. जेवण झाल्यानंतर पाचही जण हॉटेलच्या बाहेर रस्त्यालगत बराच वेळ गप्पा मारत थांबले होते. मंगळवारी (दि.१६) पहाटे २ वाजेच्या सुमारास ते घरी जाण्यास निघाले. प्रविण बांगड व मनोज वायकर हे दोघे दुचाकीवरुन (एमएच-२०, बीएच- ०१०९) घरी निघाले. कामगार चौकालगत असलेल्या प्रशांत पेट्रोल पंपासमोर अडीच वाजेच्या सुमारास वाळूजकडून औरंगाबादच्या दिशेने जाणाऱ्या भरधाव कंटेनरने बांगड यांच्या दुचाकीला जोराची धडक दिली व भरधाव वेगाने निघून गेला. या अपघातात वायकर हा उडून उजव्या बाजूला पडल्याने तो कंटेनरच्या मागच्या चाकाखाली सापडून जागीच ठार झाला. तर बांगड हे डाव्या बाजूला पडल्याने थोडक्यात बचावले आहेत. परंतू त्यांच्या डोक्याला, हाता-पायाला व छातीला जोराचा मार लागल्याने गंभीर जखमी झाले आहेत.