अकोल्यात ख्रिस्ती धर्मियांचा 'पाल्म संडे' हर्षोल्हासात साजरा 

अकोला: शहरासह अकोला जिल्ह्याच्या विविध भागांमध्ये रविवार, १४ एप्रिल रोजी खिश्चन धर्मियांनी पाल्म संडे अर्थात वल्हांडणाचा पवित्र सण मोठ्या हर्षोल्हासात साजरा केला. या सणाला झावळयाचा रविवार असेही म्हणतात. शहरातील दहा प्रार्थनास्थळांमध्ये (चर्च) यावेळी प्रार्थनासभांचे आयोजन करण्यात आले होते. दरम्यान, प्रभू येशू खिस्तांच्या वधस्तंभावरील दु:खसहनाची आठवण म्हणून येत्या शुक्रवारी संपूर्ण जगभर गुड फ्रायडे अर्थात उत्तम शुक्रवार हा सण साजरा करण्यात येईल, त्यानंतरच्या रविवारी प्रभू येशूंच्या पुनरुत्थानानिमित्त खिश्चन धर्मीय ईस्टर संडे हा सण साजरा करणार आहेत. 

प्रभू येशू खिस्तांनी अखिल मानवजातीच्या पापक्षालनासाठी क्रूसखांबावर दिलेल्या बलिदानाची आठवण म्हणून जगभरात गुड फ्रायडे (उत्तम शुक्रवार) हा सण साजरा केला जातो. तत्पूर्वी येशूंचे यरूशलेम नगरीत आगमन झाल्यानिमित्त रविवारी पाल्म संडे (झावळयाचा रविवार) साजरा करण्यात येतो. अकोल्यातही रविवारी हा सण मोठ्या हर्षोल्हासात साजरा करण्यात आला. यावेळी शहर आणि जिल्ह्यातील सुमारे ३० चर्चेसमधून प्रार्थनासभांचे सकाळी आयोजन करण्यात आले. खदान खिश्चन कॉलनी येथील बेथेल सेव्हिअर्स अलायन्स चर्चमध्ये रविवारी सकाळी ९ वाजता आयोजित प्रार्थनासभेमध्ये, पास्टर निलेश अघमकर यांनी पविञ बायबलमधील वचनांचा आधार घेत, पाल्म संडेचे महत्व विशद केले. तत्पूर्वी जस्टीन मेश्रामकर, पास्टर अघमकर यांच्या नेतृत्वात सकाळी ख्रिश्चन कॉलनीमधून दिंडी काढण्यात आली. यावेळी होसान्ना, प्रभूच्या नावाने येणारा राजा धन्यवादित असो अशा घोषणा देण्यात आल्या. यामध्ये संडेस्कूल, महिला संघ, तरुण संघाचे सदस्य सहभागी झाले होते. 

सध्या खिश्चन धर्मियांचा पवित्र लेन्थ महिना सुरु आहे. या चाळीस दिवसांच्या काळात खिश्चन बंधू-भगिनी उपवास आणि प्रार्थना करतात. घरोघरी कॉटेज प्रेअर्सचे आयोजन केले जाते. मौंदी गुरुवारनिमित्त प्रार्थनासभा होते. गुडफ्रायडेच्या दिवशी उपवासांची सांगता होते. येत्या शुक्रवारी १९ एप्रिल रोजी विविध चर्चेसमधून गुड फ्रायडेचा सण साजरा केला जाईल. त्यानंतर रविवार, २१ एप्रिल रोजी  प्रभू येशू खिस्तांच्या पुनरुत्थानानिमित्त जगभरात ईस्टर संडे हा सण साजरा करण्यात येणार आहे. त्यासाठी बेथेल सेव्हिअर्स चर्चच्या प्रांगणात शनिवारी रात्रीच एक मोठे रिंगण तयार करण्यात येते. रविवारी पहाटे सहा वाजता अकोल्यातील सर्वच चर्चचे सदस्य तेथे उपस्थित होऊन प्रात:कालच्या प्रार्थनासभेत सहभागी होतात. त्यानंतर इंग्रजांच्या काळापासून अस्तित्वात असलेल्या अकोल्यातील एकमेव खिश्चन कॉलनीमधून सकाळी साडेआठ वाजता दिंडी काढण्यात येऊन ईस्टर संडेनिमित्त विविध गीते गायली जातात. त्यानंतर चर्चमध्ये विविध कार्यक्रमांचे आयोजन करण्यात येते.