Sameer Wankhede : व्हॉट्सअप स्टेट्सला फोटो, गावच्या पोलीस पाटलांनाही समीर वानखेडेंचा अभिमान
By ऑनलाइन लोकमत | Published: October 26, 2021 08:59 PM2021-10-26T20:59:25+5:302021-10-26T21:00:25+5:30
गावात आले की ते प्रत्येकाला भेटतात, समीरसुद्धा माझ्या घरी आला होता. आपल्या गावकडच्या सर्व मुलांनी समीर वानखेडेंचे फोटो व्हॉट्सअप स्टेटसला ठेवलेत.
वाशिम - ड्रग्स माफियांवर धडाकेबाज कारवाई करून मंत्र्यांसह अभिनेत्यांना घाम फोडणारे एनसीबीचे (नार्कोटिक्स कंट्रोल ब्युरो/अंमली पदार्थ नियंत्रण कक्ष) विभागीय संचालक समीर वानखेडे हे वाशिम जिल्ह्यातील रिसोड तालुक्यातील वरूड तोफा या गावचे मूळ रहिवासी आहेत. त्यामुळेच, येथील गावकऱ्यांन आपल्या भूमीपुत्राचा अभिमान वाटत असून गावातील युवकांनी व्हॉट्सअपला स्टेटस म्हणून समीर यांचे गावातील फोटो ठेवले आहेत. गावच्या पोलीस पाटील यांनीही समीरसोबतच्या आठवणी जागवल्या आहेत. सध्या, वाशिम जिल्ह्यास वरुड तोफा गाव चांगलंच चर्चेत आहे. (People of the Washim district pride to Sameer Wankhede.)
गावात आले की ते प्रत्येकाला भेटतात, समीरसुद्धा माझ्या घरी आला होता. आपल्या गावकडच्या सर्व मुलांनी समीर वानखेडेंचे फोटो व्हॉट्सअप स्टेटसला ठेवलेत. कालपासून आपल्या पीएसआयचेसुद्धा फोन येऊन राहिलेत, समीर वानखेडे नेमका कुठलाय? हीच विचारणा करतायंत, असे गावच्या पोलीस पाटलांनी सांगितलं. समीरचं घर गावात आहे, शेती आहे, त्यांचं शिक्षणही इथच झालंय. आता, ते मुंबईत स्थायिक झाले आहेत. पण, गावाकडं आलं की सगळ्यांना भेटून जातात, लहान मुलांसाठी खाऊ आणतात, चॉकलेट आणतात, अशी आठवणही पोलीस पाटलांनी सांगितली.
समीर वानखेडे यांचे मूळगाव असलेले वरूड तोफा हे वाशिम-रिसोडवरील आसेगावपासून ५ किमी अंतरावर आहे. याठिकाणी समीर वानखेडे यांची वडीलोपार्जीत शेती व घर असून येथे त्यांचे चुलत भावंड राहतात. त्यांचे वडील मुंबई येथे पोलीस विभागात अधिकारी म्हणून नोकरीवर असताना, ते मुंबईतच स्थाईक झाले. समीर यांचे संपूर्ण शालेय शिक्षण तेथेच झाले असून, आजही सणावाराला आणि लग्नाकार्याला ते गावी येतात. त्यावेळी, गावकऱ्यांच्या भेटीगाठी घेऊन, गप्पागोष्टी करत असतात.
समीर वानखेडे 2008 च्या बॅचचे अधिकारी
समीर हे आयआरएसच्या २००८ च्या बॅचचे अधिकारी आहेत. समीर वानखेडे हे ड्रग्सशी संबंधित प्रकरणांचा छडा लावण्यात तज्ज्ञ मानले जातात. त्यांच्या नेतृत्वात गेल्या दोन वर्षांत सुमारे १७ हजार कोटींच्या ड्रग्स रॅकेटचा पदार्फाश झाला आहे. अलिकडेच समीर वानखेडे यांची डीआरआयमधून नार्कोटिक्स कंट्रोल ब्युरोमध्ये बदली झाली. सुशांतपासून ते बॉलिवूडचा बादशहा शाहरूख खानच्या मुलापर्यंत त्यांनी कारवाया केल्या आहेत. ड्रग्स माफियांचा कर्दनकाळ आणि मंत्री नबाब मलिक यांनाही घाम फोडणारे समीर वानखेडे मूळ वाशिमकर असल्याचे समजताच जिल्हावासियांमधून आनंद व्यक्त केला जात आहे.
विविध पदांवर बजावले कर्तव्य -
२००८ ते २०२१ पर्यंत त्यांनी एअर इंटेलिजन्स युनिटचे (एआययू) उपायुक्त, राष्ट्रीय तपास यंत्रणेचे (एनआयए) अतिरिक्त एसपी, महसूल गुप्तचर संचालनालयाचे (डीआरआय) संयुक्त आयुक्त आणि आता नार्कोटिक्स कंट्रोल ब्युरोचे (एनसीबी) विभागीय संचालक, अशा विविध महत्त्वाच्या पदांवर काम केले आहे.
गावाशी ऋणानुबंध कायम! -
समीर वानखेडे यांचे बालपण मुंबईत गेले असले तरी गावाशी असलेला ऋणानुबंध त्यांनी कायम ठेवला आहे. नोकरीत असतानाही ते दीड, दोन वर्षातून एकदा आपल्या गावी वरूड तोफा येथे आवर्जून येतात. याशिवाय कुटुंब तसेच भावकितील महत्वाच्या कार्यातही ते हजेरी लावतात.