चारित्र्याचा संशय घेऊन पतीने केला पत्नीवर चाकूने हल्ला; पतीनेही केला आत्महत्येचा प्रयत्न

मुस्ती येथील घटना: पतीवर गुन्हा दाखल

सोलापूर : चारित्र्याचा संशय घेऊन पतीने पत्नीच्या पोटात जिवे मारण्याच्या हेतूने चाकूने वार केल्याची घटना गुरुवार २१ ऑक्टोबर २०२१ रोजी पहाटेच्या सुमारास मुस्ती (ता. द. सोलापूर) येथे घडली.

काजल धनराज भालेराव (वय २४, रा. पांढरी. ता. लोहारा, जि. उस्मानाबाद, सध्या - मुस्ती, ता.द.सोलापूर) या महिलेने दिलेल्या फिर्यादीवरून धनराज मधुकर भालेराव (वय ३०, रा. पांढरी, ता. लोहारा, जि. उस्मानाबाद) याच्या विरोधात वळसंग पोलीस ठाण्यात गुन्हा दाखल करण्यात आला आहे. याबाबत पोलिसांनी दिलेली माहिती अशी की, काजल यांचा धनराज याच्या बरोबर विवाह झाला हाेता. विवाहानंतर धनराज याने पत्नी काजलवर चारित्र्याचा संशय घेऊन मारहाण केली. त्यामुळे काजल ही मागील चार वर्षांपासून माहेरी (रा. मुस्ती) येथे राहत होती.

मंगळवार १९ ऑक्टोबर २०२१रोजी नवरा धनराज हा मुस्ती येथे आला. २१ ऑक्टोबर रोजी पहाटे काजलजवळ येऊन तू माझी नाही तर कुणाची नाही असे मोठ्याने ओरडल्याने काजल ही भीतीने घाबरून जागी झाली. याचवेळी पती धनराज याने त्याच्या जवळील चाकूने काजलच्या पोटात जिवे मारण्याच्या हेतूने वार करून गंभीर जखमी केले. याचवेळी काजलने चाकूचा दुसरा वार हाताने अडविला त्यावेळी काजलच्या दोन्ही हाताला मोठी जखम झाली. या घटनेची नोंद वळसंग पोलीस ठाण्यात झाली असून पती धनराज विरोधात पोलीस ठाण्यात गुन्हा दाखल करण्यात आला आहे. या घटनेचा पुढील तपास सहायक पोलीस निरीक्षक अतुल भोसले हे करीत आहेत.

--------

पतीने केला आत्महत्येचा प्रयत्न...

या घटनेनंतर पती धनराज भालेराव याने स्वत: पोटात त्याच चाकूने भोसकून घेऊन आत्महत्या करण्याचा प्रयत्न केल्याचा प्रकार समोर आला आहे. या घटनेची नोंद वळसंग पोलिसात झाली आहे. याबाबत पोलीस हेडकॉन्स्टेबल रमेश शामराव माने यांनी फिर्याद दिली आहे.