बहिणीची छेड काढली, सरपंचाला भरचौकात चोप; गोंडपिपरीतील घटना

राजकीय वर्तुळात खळबळ

चंद्रपूर : बहिणीची छेड काढणाऱ्या सरपंचाला भावंडांनी भरचौकात चोप दिल्याची घटना गोंडपिपरी शहरात सोमवारी घडली. या घटनेने राजकीय वर्तुळात खळबळ उडाली आहे. विशेष म्हणजे हा सरपंच एक मोठ्या राजकीय पक्षाचा पदाधिकारी आहे. या प्रकाराची तक्रार अद्यापही पोलिस स्टेशनला नसल्याची माहिती आहे.

सरपंच तथा एका मोठ्या राजकीय पक्षाच्या पदाधिकाऱ्याने बसमध्ये एका मुलीची छेड काढली. ही बाब मुलीने घरी गेल्यानंतर आपल्या भावंडांना सांगितली. भावांचा संताप अनावर झाला. अशातच सोमवारी सरपंच तहसील कार्यालय परिसरात असल्याची माहिती त्या भावंडांना मिळाली. भावंडांनी गोंडपिपरी तहसील कार्यालय गाठले. सरपंचाची यथेच्छ धुलाई केली.

ही वार्ता गोंडपिपरी तालुक्यात वाऱ्यासारखी पसरली. विशेष म्हणजे धुलाई करताना अनेकांनी बघितले. मात्र सरपंचाला सोडवायला कुणीच गेले नाही. या घटनेची तालुक्यात खमंग चर्चा सुरू आहे. समाजमाध्यमात सरपंचाचे चांगलेच चिमटे काढले जात आहेत. दरम्यान माझ्यावर राजकीय वैमनस्यातून हल्ला करण्यात आला. मी कोणत्याही मुलीची छेडखानी केली नाही, अशी बाजू सरपंच समाजमाध्यमात मांडत आहे.

घटना घडल्याची चर्चा शहरात सुरू आहे. मात्र अद्याप कोणतीही तक्रार पोलिस स्टेशनला प्राप्त झाली नाही.

- जीवन राजगुरू, ठाणेदार, गोंडपिपरी